Monday, February 27, 2006

கவர்ந்த கட்டுரைகள்

எத்தனையோ கட்டுரைகளை படிக்கிறோம், சில கட்டுரைகள் நாம் படிக்கும் போது “அட...!” போட வைக்கும். சமீபத்தில் நான் படித்த சில “அட...!” கட்டுரைகள்…

1. தீராநதி 1-6-2006 இதழில் வாஸந்தி எழுதிய “நீர்த்துப்போன கொள்கைகள்”. குமுதம் வலைத்தளத்தில் இதை படிக்கலாம்.

2. சில வாரங்களுக்கு முன் “இந்தியா முன்னேறினால் அமெரிக்காவுக்கு நல்லதா கெட்டதா” என்று சார்லஸ் வீலனால் எழுதப்பட்ட ஒரு அருமையான கட்டுரை.

3. இந்த வார ஆனந்த விகடனில் (5-3-06) வந்திருக்கும் “குட்டி டைரக்டர் கிஷன்”.

4. இதே விகடனில் “கள்வனின் காதலி” படத்தின் விமர்சனம். பத்து கிலோ சாணியை எடுத்து டைரக்டர் சூரியாவின் முகத்தில் விகடன் பூசி விட்டது. யார் யாரெல்லாம் ஹீரோவாகலாம் என்று விவஸ்தையே இல்லாமல் போய்விட்டது.

Wednesday, February 22, 2006

A Tribute to A.R. Rahman

போன வாரம் ஸ்டான்ஃபோர்டு பல்கழை கழகத்தில் “A Tribute to A.R. Rahman” என்ற ஒரு நிகழ்ச்சிக்கு சென்றிருந்தேன். Asian arts festival என்று ஒரு வாரம் நடந்த திருவிழாவில் A.R. ரகுமானை கௌரவப்படுத்தும் நிகழ்ச்சியும் நடந்தது.

மாலை 7:30க்கு நிகழ்ச்சி ஆரம்பம். 7 மணிக்கே போய் இரண்டாவது வரிசையில் இடம் பிடித்து விட்டேன். Asian festival என்பதாலோ என்னவோ நிகழ்ச்சியை தாமதமாக தான் ஆரம்பித்தார்கள். ஆரம்பமே அசத்தலாக இருந்தது. ஸ்டான்ஃபோர்டு மாணவ, மாணவியர் லகான் படத்திலிருந்து ஒரு பாடலை (Ghanan Ghanan) பாடி ஆடி காட்டினார்கள். ரகுமானை இப்போதைக்கு கண்ணில் காட்டப்போவதில்லை என்று கையில் கொடுத்த புத்தகத்தில் ஏற்கனவே தெளிவாக சொல்லிவிட்டார்கள். லகான் பாடல் முடிந்ததும் நடாலி (Natalie Sarrazin) மேடையேறினார். நடாலி இந்திய இசையை பற்றி ஆராய்ச்சி செய்தவர். ஹிந்தி கொஞ்சம் தெரிந்து வைத்துள்ளார். அழகாக பேசினார்.

மேடையில் உள்ள பெரிய திரையில் 1950களிலிருந்து வந்த பல திரைப்பட பாடல்களை போட்டுக் காண்பித்து இந்திய சினிமா இசை எந்த அளவுக்கு evolve ஆனது என்பதை சுவாரசியமாக விமர்சித்தார். ரகுமான் இந்திய சினிமா இசையை எப்படி மாற்றி அமைத்தார் என்பதை நகைச்சுவையோடு விளக்கினார். “இந்திய சினிமாவில் வன்முறையான கத்தலுடன் ஒரு பாட்டு ஆரம்பித்தால் பெரும்பாலும் அது காதல் பாட்டாகத்தான் இருக்கும்” என்ற முத்தாய்ப்புடன் அவர் காண்பித்த பாட்டு ஷாருக்கானை நினைத்து கஜோல் குளியல் அறையில் வெறும் துண்டை மட்டும் உடம்பில் உடுத்திக்கொண்டு பாடுவது. என்ன படம் என்று தெரியவில்லை. ஒரு நிமிடம் கழித்து அடுத்த பாட்டைப் பற்றி பேசுவதற்காக அந்த பாட்டை நிறுத்திய போது அரங்கத்தில் ஏக்கம் நிறைந்த கூச்சல்கள். நடாலி ரொம்ப கூலாக “ரொம்ப அலையாதீங்க…அவள் அந்த துண்டை பாட்டு முடியும் வரை கழட்ட மாட்டாள்” என்று சொல்லி விட்டு ரோஜா படப்பாடலைப் பற்றி பேச ஆரம்பித்து விட்டார்! நடாலியின் சொற்பொழிவில் என்க்கு ஆச்சரியமான சமாசாரம் சீனப்படம் (Warriors Of Heaven And Earth) ஒன்றிற்கு ரகுமான் இசை அமைத்தது தான். அந்த படத்தின் கிளிப்பிங்க் ஒன்று போட்டு காண்பித்தார்கள். Lovely… படம் வந்து இரண்டு வருடங்களாகி விட்டது போல, ஆனால் எனக்கு இது புதிய தகவல்.

நடாலி பேசி முடித்தவுடன் ரகுமான் மேடைக்கு வந்தார். ரொம்ப சிம்பிளான மேடை செட்டிங். ரகுமானும் ரொம்பவும் சிம்பிளாக இருந்தார். நடாலி ரகுமானை இண்டர்வியூ செய்வதாக ஏற்பாடு. மொத்த நிகழ்ச்சியும் கேஷுவலாக இருந்தது. தான் எப்படி சினிமா இசைக்குள் நுழைந்தது, ரோஜா பட பாடல்களின் அனுபவம், ரோஜா ஹம்மிங், வந்தே மாதரத்தின் இசையமைப்பு, லார்டு ஆஃப் த ரிங்ஸ் பட இசையமைப்பு, சீன பட அனுபவங்கள் என்று பல்வேறு திசைகளில் ரகுமானும் நடாலியும் பேசுவதை கேட்க ஆடியன்ஸுக்கு ஒரு நல்ல அனுபவம். ரகுமான் கொஞ்சம் கூட அலட்டிக்கொள்ளவேயில்லை. Very Simple. இயல்பாக இருந்தார். வார்த்தைக்கு வார்த்தை சிரிப்பு. தன் வெற்றி அனைத்திற்கும் கடவுள் தான் காரணம் என்று சொல்கிறார். கேள்வி பதில் நிகழ்ச்சி முடிந்ததும் அவரது சாதனைகளுக்காக விருது கொடுத்து கௌரவப்படுத்தினார்கள். Congratulations Mr. Music!

கேள்வி பதில் நிகழ்ச்சி முடிந்ததும் மாணவ மாணவியர் அலைபாயுதே மற்றும் வந்தே மாதரம் பாடல்களை பாடினார்கள். பிரமாதம். அழகும் அறிவும் ஒன்றாக சேராது என்று சொல்பவர்கள் ஸ்டான்ஃபோர்டு பக்கம் எட்டிப்பார்த்து விட்டு போங்கள்! வந்தே மாதரம் பாடலில் சில அமெரிக்க மாணவர்களும் சீன மாணவரும் நம் ஊர் மாணவர்களுடன் சேர்ந்து பாடியது சூப்பர். அது ஒரு பொன் மாலை பொழுது்…

ரகுமானை நடாலி கேள்விகள் கேட்ட பிறகு ஆடியன்ஸும் பத்து கேள்விகள் கேட்கலாம் என்று அறிவித்தார்கள். இரண்டு நிமிடத்தில் 20 பேர் வரிசையில் நின்று விட்டார்கள்.

ஒரு அமெரிக்கர் கேட்ட கேள்வி: “சினிமாவுக்கு வந்த 14 வருடங்களில் நல்ல உயரத்துக்கு போய் விட்டீர்கள். உங்களுக்கு career management skills நிறைய உள்ளது. அதைப்பற்றி கொஞ்சம் சொல்ல முடியுமா?”

“நானாக எதுவும் பிளான் செய்யவில்லை. கடவுள் தான் சிறந்த திட்டமிடுபவர். அவரிடம் அந்த பொறுப்பை ஒப்படைத்து விடுகிறேன்” என்று ரகுமான் சொன்னார். நான் அதை நம்பவில்லை! தன் ஒவ்வொரு அடியையும் ஆரம்பத்திலிருந்தே கவனமாக எடுத்து வைத்திருக்கிறார். திட்டமிட்டு ஹிந்தி திரைக்குள் சென்றார். ஹிந்திக்கு அவர் செல்லாமலிருந்திருந்தால் அவரின் திறமை மற்றவர்களுக்கு தெரிந்திருக்காது. இந்தியா முழுதும் பிரபலமானதால் Bombay dreams, Lord of the rings என்று மேலும் வாய்ப்புகள். தமிழ் படங்களுக்கு மட்டும் இசை அமைத்து கொண்டிருந்திருந்தால் அவரால் இந்த அளவுக்கு புகழ் பெற்றிருக்க முடியாது என்று தான் எனக்கு தோன்றுகிறது.


அடுத்து ஒரு அமெரிக்க பெண்மணி வந்தார். அவர் கேட்ட கேள்வியும் ரகுமானின் பதிலும்:

“நான் ஒரு Matchmaker. உங்களை போல இள வயதில் நிறைய சாதித்தவர்களை கல்யாணம் செய்து கொள்ள நிறைய பேர் காத்திருக்கிறார்கள். உங்களுக்கு ஒரு நல்ல பெண்ணாக நான் பார்க்கட்டுமா?”

ரகுமானால் சிரிப்பு தாங்க முடியவில்லை. “ஹலோ, என் மனைவி என்னை கொன்று விடுவார்!”

அமெரிக்க பெண்மணி பேசிக்கொண்டே போகிறார். ரகுமான் சொன்னதை காதில் வாங்கிக் கொள்ளவேயில்லை.

ரகுமான் திரும்பவும் சொன்னார் “ஹலோ, எனக்கு ஏற்கனவே கல்யாணமாகி விட்டது. மூன்று குழந்தைகள் இருக்கின்றார்கள்”

அப்போது தான் அந்த பெண்மணி கல்யாணம் செய்வதால் என்ன நன்மை என்ற தன் சொற்பொழிவை நிறுத்தினார். “ஆ…உங்களுக்கு ஏற்கனவே கல்யாணம் ஆகி விட்டதா?!” என்று ஏமாற்றத்துடன் போய் விட்டார்.

Sunday, February 12, 2006

இந்தியாவா, சீனாவா?

எந்த நாட்டில் முதலீடு செய்வது புத்திசாலித்தனமானது? எந்த நாட்டின் வளர்ச்சி அதிகமாக இருக்கும்? இந்த கேள்விகளுக்கு விடை கொடுத்திருக்கிறார் ஜெரமி சீகல். இவர் புகழ்பெற்ற வார்ட்டன் பல்கலைகழகத்தில் பணிபுரிகிறார். இவரின் கட்டுரைகளை படித்து சந்தோஷப்பட்டேன். நான் பெற்ற இன்பம் இந்த வையகம் பெற...

http://finance.yahoo.com/columnist/article/futureinvest/2369

http://finance.yahoo.com/columnist/article/futureinvest/2542

Related Posts Plugin for WordPress, Blogger...