Thursday, December 08, 2005

பூகம்பம் வரப்போவதை முன்கூட்டியே கணிக்க முடியுமா?

பூகம்பத்தை மனிதர்கள் உணரும் முன்பே மிருகங்களால் உணர முடியும் என்பது ஏற்கனவே நிரூபிக்கப்பட்டிருக்கிறது. மேக கூட்டங்களால் பூகம்பத்தை முன்கூட்டியே உணர முடியுமா? ஆமாம் என்கிறார் நியூயார்க்கில் வாழும் ஸாங்கோ ஸௌவ் (Zhonghao Shou) என்பவர். பூகம்பம் ஏற்படுவதற்கு சில தினங்கள் முன்பாகவே பூமியின் தட்டுகள் ஒன்றையொன்று உரசிக்கொள்ள ஆரம்பிக்கின்றன. அதனால் அந்த பகுதிகளில் உள்ள நிலத்தடி நீர் 300 டிகிரி செல்சியஸிலிருந்து 1500 டிகிரி செல்சியஸ் வரை சூடாகின்றது. இந்த சுடு நீர் வெப்பக் காற்றாக மேலே எழுந்து வித்தியாசமான வடிவங்களை உடைய மேக கூட்டங்களாக கூட்டமாக கூடுகிறது என்று ஸாங்கோ சொல்கிறார். இந்த வடிவங்கள் அரிக்கன் விளக்கு போலவோ, பாம்பு போலவோ அல்லது நேர் கோடு போலவோ தோன்றும் என்று கூறுகிறார்.

தன்னுடைய கணிப்புகள் இது வரை எப்படி உண்மையாகி உள்ளது என்று தன் வலைதளத்தில் விளக்கமாக எழுதியுள்ளார். விபரங்களுக்கு இங்கு செல்லவும். அக்டோபர் 8ம் தேதி அன்று பாகிஸ்தானில் ஏற்பட்ட பூகம்பத்தை செப்டம்பர் 28ம் தேதியே கணித்து விட்டதாக கூறுகிறார். உண்மையாக இருக்கலாம். பாகிஸ்தான் பூகம்பத்துக்கு பிறகு தான் இந்த வலைத்தளத்தை நான் பார்த்தேன். அக்டோபரிலிருந்து இவருடைய கணிப்பை தொடர்ந்து பார்த்து வருகிறேன்.

அக்டோபர் 6ம் தேதி அன்று வடக்கு கலிபோர்னியாவில் 4.8 அல்லது அதற்கும் மேல் மதிப்புள்ள பூகம்பம் வரலாம் என்று கணித்திருந்தார். நல்ல வேளையாக அப்படி ஒன்றும் நடக்கவில்லை.இலங்கைக்கு கிழக்கே ரிச்சர் ஸ்கேலில் 5க்கு மேல் மதிப்புள்ள பூகம்பம் வரும் என்று கணித்திருந்தார். அக்டோபர் 16ம் தேதி அன்று அப்படி ஒரு பூகம்பம் வந்ததாகவும் தன்னுடைய வளைத்தளத்தில் எழுதியுள்ளார். விபரங்கள் இங்கே: http://quake.exit.com/images_2005_5.htm. அப்படி ஒரு பூகம்பம் நடந்ததாக நான் படிக்கவில்லை, உங்களுக்கு தெரிந்திருந்தால் சொல்லுங்கள். அதே போல இந்தியாவில் கேரளவுக்கு மேலே உள்ள பகுதிகளில் 6.5க்கு பூகம்பம் வரும் என்று அக்டோபர் 14 அன்று கணித்திருந்தார். பத்து நாட்களில் “நான் கணித்தது தவறாக இருக்கலாம்” என்று சொல்லிவிட்டார். தான் சொல்லியது சரி தான் என்று மல்லுக்கட்டாமல் “Sorry, it may be wrong” என்று சொல்லிவிடுகிறார். போன வருடம் டிசம்பர் 26 அன்று தமிழகத்திலும் இலங்கையிலும் கொடூர தாண்டவம் நடத்திய சுனாமி உருவானது கடலுக்கடியில் ஏற்பட்ட பூகம்பத்தால் தான். அந்த பூகம்பத்தை டிசம்பர் 13ம் தேதி அன்றே கணித்திருக்கிறார்.



மேலும் விபரங்களுக்கு http://quake.exit.com/images_2004_6.htm. இந்தோனிஷியாவில் “Geoeruption” ஏற்படும் என்று இவரால் சொல்ல முடிந்திருக்கிறது. தன் சொந்த செலவிலும் மற்றவர்களின் நன்கொடை மூலமாகவும் பூகம்ப ஆராய்ச்சியை தொடர்ந்து செய்து வருகிறார். அக்டோபர் 30, 2005க்கு பிறகு சீனாவுக்கு சென்று விட்டார். பிப்ரவரியில் திரும்ப வர போவதாக அவர் வலைத்தளம் சொல்கிறது.

புவியியல் பற்றி எனக்கு அதிகம் தெரியாததால் இவரின் கண்டுபிடிப்புகளை பற்றி முழுமையாக என்னால் கருத்து சொல்ல முடியவில்லை. ஆனாலும் இவரது வலைத்தளத்தில் உள்ள புகைப்பட ஆதாரங்களை பார்க்கும்போது இவர் மேல் மரியாதையும் நம்பிக்கையும் வருகிறது.

1 comment:

Anonymous said...

படங்கள் மிக சிறிதாக இருக்கின்றது தெளிவாக இல்லை!இதைப்பற்றி முன்பு ஒரு முறை கேள்விப்பட்டுள்ளேன்!! இது உண்மையா போய்யா என்று கூறுவதற்கு இன்னும் நிறைய ஆராச்சி தேவைப்படும்!! என்னை பொறுத்தவரையில் இவருடைய கணிப்பு முறை சற்று சந்தேகமே!

Related Posts Plugin for WordPress, Blogger...