Thursday, November 24, 2005

ஆழ்நிலை தியானம்

இன்று அமெரிக்காவில் நன்றி சொல்லும் நாள் (Thanksgiving day). மற்ற நாட்களில் நன்றி சொல்லக்கூடாது என்றில்லை! அமெரிக்கர்கள் முதன் முதலாக ஐரோப்பாவிலிருந்து இங்கு வந்த போது தங்களுக்கு உதவியர்களை நினைவு கூறும் நாள்.

ஆழ்நிலை தியானத்தை எனக்கு அறிமுகப்படுத்தியதற்காக என் நண்பன் அன்பரசனுக்கு நான் அவசியம் நன்றி கூற வேண்டும். அவரிடம் பல முறை சொல்லியிருக்கிறேன். இந்த பதிவு மூலமாக திரும்பவும் நன்றி கூறுகிறேன். ஆழ்நிலை தியானத்துக்கும் கோடி நன்றி!.

பல வருடங்களுக்கு முன்னால் கல்லூரி பாடங்களில் தலையை பிய்த்து கொண்டிருந்த போது "ஒரு தியானத்தை பற்றி கேள்விப்பட்டேன். இன்று சாயந்தரம் போறேன், நீயும் வா" என்று அன்பரசன் கூப்பிட்டார். ஈகா தியேட்டரில் பக்கத்தில் உள்ள அமைதியான இடம் அது. மனதை சாந்தப் படுத்தும் இடம். அறிமுக வகுப்பு தொடங்குவதற்கு சிறிது நேரம் இருந்ததால், அங்கே இருந்த புகைப்படங்களை எல்லாம் வேடிக்கை பார்த்து கொண்டிருந்தோம்.

ஒரு புகைப்படத்தில் சில மனிதர்கள் பறந்து கொண்டிருந்தார்கள். அவர்களின் உடம்பு தரையை விட்டு மேலே இருந்தது. அது பித்தலாட்டம் போல எனக்கு தோன்றியது. "இவனுங்க ஏதோ பிராடு போல தெரியுது, வா அன்பு நாம போயிரலாம்" என்று அன்பரசனிடம் சொன்னேன். அன்பரசன் சிரித்து கொண்டே "இவ்வளவு தூரம் வந்துட்டோம், என்னன்னு பார்த்துட்டு போயிடலாம்" என்று சொல்லி விட்டார்.

பதினைந்து நிமிடங்களில் அறிமுக வகுப்பு தொடங்கியது. வகுப்பில் பேசியவர் ரொம்பவும் தெளிவாக பேசினார். கொஞ்சமாக நம்பிக்கை வந்தது. அப்புறம் தனியாக ஒரு அறையில் கடவுள் படத்தின் முன்னே உட்கார்ந்து ஒரு மந்திரம் சொல்லிக் கொடுத்தார்கள். "வேறு யாருக்கும் இந்த மந்திரம் தெரிய கூடாது. தெரிந்தால் இந்த மந்திரத்துக்கு effect இருக்காது" என்று பயமுறுத்தினார்கள்.

முதல் முறை தியானம் செய்த போது மனது அலை பாய்ந்து கொண்டிருந்தது. சில நாட்களில் மனது கட்டுப்பட்டது. சில மாதங்களில் தியானம் செய்வது தன்னிச்சை செயலாக மாறிவிட்டது.

ஆழ்நிலை தியானத்தின் பயன்கள் பல, அவை ஒவ்வொன்றையும் இங்கே எழுதி போரடிக்க விரும்பவில்லை. http://www.tm.org/ என்ற ஒரு அருமையான தளம் ஆழ்நிலை தியானத்தை உருவாக்கியவர்களால் நடத்தப்படுகிறது. அங்கே எல்லா விபரங்களும் உள்ளன.

நம் புத்தர் தற்காப்பு கலைகளை சீனாவில் பரப்பியது போல மகரிஷி ஆழ்நிலை தியானத்தை உலகம் முழுதும் சொல்லிக் கொடுக்கிறார். பொதுவாகவே எனக்கு சாமியார்களின் மேல் வெறுப்பு உண்டு. அதனால் மகரிஷி மேல் எனக்கு எந்த பக்தியும் இல்லை. ஆனால் ஒரு நல்ல விஷயத்தை சொல்லிக் கொடுத்ததற்காக நான் நன்றி சொல்ல கடமைப் பட்டிருக்கிறேன். என் அமெரிக்க நண்பர்கள் சிலர் ஆழ்நிலை தியானத்தின் மேல் தீவிர ஈடுபாட்டுடன் இருக்கிறார்கள். இங்கு கலிபோர்னியாவில் Palo Alto என்ற ஊரில் ஆழ்நிலை தியான மையம் உள்ளது. சென்னை அளவு இல்லாவிட்டாலும் அருமையாக பராமரிக்கிறார்கள்.

Iowa மாநிலத்தில் Fairfield என்ற ஒரு ஊரே ஆழ்நிலை தியானம் செய்து வருகிறது. நம் ஊர்களில் எல்லோரும் இந்த மாதிரி தியானம் செய்து வந்தால் ஜாதி மத போராட்டங்களுக்கு வேலையில்லாமல் போய்விடும்.

Monday, November 21, 2005

ஆப்ஷன் - பாகம் 5

பாகம் 1 பாகம் 2 பாகம் 3 பாகம் 4 பாகம் 6 பாகம் 7

ஆப்ஷன்களிலே ரொம்ப கவர்ச்சியானது Put ஆப்ஷனை விற்பது. கவர்ச்சியென்றால் கூடவே ஆபத்தும் கை கோத்துக்கொண்டு வரும். இந்த ஆப்ஷனை சரியான முறையில் கையாண்டால் நிறைய பணம் சம்பாதிக்கலாம். கொஞ்சம் அசந்து விட்டாலும் முதலுக்கே மோசமாகி விடும்.

இந்த ஆப்ஷன் ஏன் கவர்ச்சியானது? முதல் போடாமலே வருமானம் கிடைக்கும். அது தான் காந்தம் போல நிறைய பேரை சுண்டி இழுக்கிறது. நாம் ஏற்கனவே பார்த்த அத்தனை ஆப்ஷன்களுக்கும் முதல் போட வேண்டும்.

  • Call ஆப்ஷனை வாங்குவதற்கு பணம் வேண்டும்.
  • Call ஆப்ஷனை விற்பதற்கு பங்குகளை வைத்திருக்க வேண்டும், அந்த பங்குகளை வாங்குவதற்கு பணம் வேண்டும்.
  • Put ஆப்ஷனை வாங்குவதற்கும் பணம் வேண்டும்.
  • ஆனால் Put ஆப்ஷனை விற்பதற்கு மட்டும் பணம் முதலீடு செய்ய வேண்டிய அவசியம் இல்லை.

வழக்கம் போல ஒரு உதாரணத்தை எடுத்து கொள்வோம். Google பற்றியே பேசி கொஞ்சம் அலுத்து விட்டது. பில் கேட்ஸை கொஞ்சம் வம்புக்கு இழுப்போம்.

எட்டு வருடங்களுக்கு முன்னால் வாகினி என்பவர் மைக்ரோசாப்ட் நிறுவனத்தின் 1000 பங்குகளை ஒரு பங்கு $15 விலைக்கு வாங்கி வைத்திருக்கிறார். $15,000 முதலீடு செய்திருக்கிறார். இந்த பங்குகள் $60 விலை வரை சென்று தற்போது $28க்கு விற்கிறது. இன்னும் இரண்டு வருடங்களில் ஓய்வு பெற்று விடலாம் என்ற சிந்தனையில் வாகினி இருக்கிறார். அந்த சமயத்தில் இந்த பங்குகளை விற்று விடலாம் என்று அவருக்கு எண்ணம் இருக்கிறது. ஆனால் ஒரு உறுத்தல். "ஒரு வேளை இந்த பங்குகள் $15க்கு கீழே போய் விட்டால்?". Mini-Microsoft என்ற ஒரு வலைப்பதிவும் அவரை கொஞ்சம் யோசிக்க வைக்கிறது. "எதற்கு வம்பு, பேசாமல் Put ஆப்ஷனை வாங்கி வைத்து விடலாம்" என்று முடிவெடுக்கிறார்.

வாகினியிடம் 1000 பங்குகள் இருக்கிறது. ஒரு Put ஒப்பந்தம் 100 பங்குகளை தான் பாதுகாக்கும். எனவே அவர் 10 Put ஒப்பந்தங்களை வாங்க வேண்டும். இன்னும் இரண்டு வருடங்கள் கழித்து இந்த பங்குகளை விற்க போவதால், ஜனவரி 2008க்கான $30 Put பத்து ஒப்பந்தங்களை $3000 கொடுத்து வாங்குகிறார். ஏற்கனவே பங்குளை வாங்குவதற்கு $15,000 முதலீடு செய்துள்ளார். இப்போது ஆப்ஷன் வாங்குவதற்கு $3,000 முதலீடு செய்திருக்கிறார். மொத்தம் $18,000 முதலீடு. இவர் நிச்சயமாக நஷ்டமடைய போவது கிடையாது. ஜனவரி 2008க்குள் எப்போது வேண்டுமானாலும் அவரிடம் உள்ள மைக்ரோசாப்ட் பங்குகள் ஆயிரத்தை $30,000க்கு விற்று விட அவருக்கு உரிமை இருக்கிறது.

விவேக் என்பவர் வாகினிக்கு Put ஒப்பந்தங்களை விற்கிறார் என்று வைத்துக்கொள்வோம். வாகினி கொடுக்கும் $3000 பணமும் விவேக்கின் கைக்கு போய்விடும். வாகினியிடமிருந்து 1000 மைக்ரோசாப்ட் பங்குகளை $30க்கு வாங்கி கொள்வதாக கொடுத்த வாக்குறுதிக்கு கிடைத்த தொகை.

Put ஆப்ஷன் விற்பது செக்ஸியாக இருப்பதற்கு இன்னொரு காரணம்: Call ஒப்பந்தங்களை விற்பதற்கு விவேக்கின் கைவசம் பங்குகள் இருக்க வேண்டும். ஆனால் Put ஒப்பந்தங்களை விற்பதற்கு விவேக்கின் கைவசம் பங்குகள் இருக்க வேண்டிய அவசியம் இல்லை. அவர் நினைத்தால் அவர் விரும்பிய படி எத்தனை Put ஒப்பந்தங்களையும் விற்கலாம். அதற்கான பணம் அவருக்கு கிடைத்து விடும்.

ஒரு வேளை வாகினி பங்குகளை $30,000க்கு விற்க முயலும்போது விவேக்கினால் வாங்க முடியாமல் போய் விட்டால், விவேக்கின் தரகர் வம்பில் மாட்டிக்கொள்வார். இந்த ஒரு காரணத்துக்காகவே நீங்கள் Put ஒப்பந்தங்களை விற்பதற்கு பெரும்பாலான தரகர்கள் ஒப்புக்கொள்ள மாட்டார்கள். ஆப்ஷனில் உங்களுக்கு நிறைய அனுபவம் உள்ளது என்று அவர்கள் நம்பினால் தான் உங்களுக்கு இந்த சலுகையே கொடுப்பார்கள். இந்த சலுகை இருந்தாலும் உத்தரவாத தொகையை (Margin requirement) உங்கள் கணக்கில் நீங்கள் வைத்திருக்க வேண்டும்.

மேலே சொன்ன உதாரணத்தில் Put ஒப்பந்தங்களை விற்பதற்கான கமிஷன் தொகையை தவிர வேறு எந்த பணமும் விவேக் தன் தரகருக்கு கொடுக்க வேண்டிய அவசியமில்லை. ஆனால் $6000 பணத்தை உத்தரவாத தொகையாக தன் கணக்கில் வைத்து கொள்ள வேண்டும். இந்த உத்தரவாத தொகையின் மதிப்பு தரகரை பொறுத்து வேறுபடும். Optionsxpress போன்ற தரகர்களிடம் 20% உத்தரவாத தொகை கொடுத்தால் போதும். (20 % * $30,000 = $6,000). சில தரகர்கள் 50% உத்தரவாத தொகை கேட்பார்கள். இந்த மாதிரி குறைந்த பணத்தை வைத்து அதிக மதிப்புள்ள பங்குகளை தன் கட்டுப்பாட்டில் வைத்திருப்பதற்கு "Leverage" என்று பெயர். இது இரு முனைகளிலும் கூர்மையான கத்தி (Double edged sword). இதை கவனமாக கையாண்டால் மட்டுமே பணம் சம்பாதிக்க முடியும்.

மைக்ரோசாப்ட் பங்குகள் விழுந்து விடுமோ என்ற பயத்தில் வாகினி Put ஒப்பந்தங்களை வாங்குகிறார். எந்த தைரியத்தில் விவேக் இவ்வளவு ரிஸ்க் எடுத்து இந்த ஒப்பந்தங்களை விற்கிறார்? Jan 2008க்குள் ஒரு வேளை இந்த பங்குகள் $10க்கு போய்விட்டால் விவேக்கிற்கு எக்கசக்கமாக நஷ்டமாகி விடுமே? விவேக்கின் நோக்கத்திற்கு பின்னால் பல காரணங்கள் உண்டு.

1. அவருக்கு மைக்ரோசாப்ட் பங்குகளின் மேல் அளவு கடந்த காதல். கூகுலின் இள வட்டங்கள் ஆர்வக்கோளாறில் சீக்கிரமே ஏதாவது வம்பில் மாட்டிக் கொள்ள போகிறார்கள் என்று தீவிரமாக நம்புகிறார். மைக்ரோசாப்ட் இப்போது விழித்துக்கொண்டு Search Engine-ல் முழு கவனம் செலுத்துகிறது, இன்னும் இரண்டு வருடங்களில் மைக்ரோசாப்ட் கூகுலை முழுசாக விழுங்கி விடும் என்ற நம்பிக்கை அவருக்கு இருக்கிறது.

2. ஜனவரி 2008ல் மைக்ரோசாப்ட் பங்குகளை $30,000க்கு வாகினியிடமிருந்து வாங்கினாலும் அவர் செலவழிக்கும் தொகை $27,000 மட்டும் தான் (Put ஒப்பந்தங்களை விற்றதில் அவருக்கு ஏற்கனவே $3,000 கிடைத்திருக்கிறது). தள்ளுபடி விற்பனையில் மைக்ரோசாப்ட் பங்குகளை வாங்குவதில் அவருக்கு கொஞ்சம் கூட தயக்கம் இல்லை.

3. ஒரு வேளை மைக்ரோசாப்ட் பங்குகள் கீழே சரிந்து கொண்டே இருந்தால் அதிலிருந்து தன்னை பாதுகாத்துக்கொள்ள Stop loss போட்டு விட்டால் அதிக நஷ்டமாகாது என்று கணக்கு போடுகிறார்

4. மைக்ரோசாப்டில் ஏதாவது பிரச்னையென்றால் கோல்ப் விளையாடும் போது பில் கேட்ஸ் தன்னிடம் சொல்வார். அதை பொறுத்து மேலும் முடிவெடுக்கலாம் என்று யோசிக்கிறார்.

மேலே சொன்னதில் நீங்கள் ஊகித்த படி நாலாவது காரணம் மட்டும் நான் சுற்றிய ரீல். அது உண்மையாக கூட இருக்கலாம், நம் ஊரிலிருந்து வந்த நிறைய பணக்காரர்கள் பில் கேட்ஸ்க்கு நண்பர்களாக இருக்கிறார்கள்.

காரணம் எதுவாக இருந்தாலும் மைக்ரோசாப்ட் பங்குகள் மீது விவேக்கிற்கு நம்பிக்கை இருக்கிறது. வாகினிக்கு நம்பிக்கை இல்லை. தன் பயத்துக்கு மருந்தாக Put ஒப்பந்தங்களை வாகினி வாங்குகிறார். அந்த பயத்தை பயன்படுத்தி Put ஒப்பந்தங்களை விவேக் விற்கிறார்.

மேலே சொன்ன உதாரணத்தில் வரவு செலவு கணக்குகளை பார்க்காமல் விட்டால் இந்த பாகம் முழுமை பெறாது.

ஜனவரி 2008-ல் மைக்ரோசாப்ட் பங்குகள் எந்த விலைக்கு விற்கும் என்று நமக்கு தெரியாது. அதனால் இருக்கும் அத்தனை வாய்ப்புகளையும் அலசுவோம்.

1. மைக்ரோசாப்ட் பங்குகள் இப்போதைய விலையை விட அதிகமாகி $40க்கு விற்கலாம்.அப்படி நடந்தால் விவேக் விற்ற Put ஒப்பந்தங்கள் காலாவதியாகி விடும். அவருக்கு $3,000 லாபம். $6,000 உத்தரவாத தொகையை தரகர் கணக்கில் வைத்திருந்தார். அந்த $6,000க்கு $3,000 லாபம், 50% லாபம்! வாகினி தன்னிடம் உள்ள 1000 பங்குகளை $40,000க்கு விற்று விடுவார். அவருக்கு $22,000 லாபம். எப்படி $22,000 லாபம் என்று நீங்கள் கேள்வி கேட்டால் ஸ்ரீராமஜெயம் நூறு முறை எழுத வேண்டும்.

2. மைக்ரோசாப்ட் பங்குகள் இப்போதைய விலையை விட குறைந்து $10க்கு விற்கலாம்.அப்படி நடந்தால் ஒரு பங்கு $30 விலைக்கு வாகினி தன்னிடம் உள்ள ஆயிரம் பங்குகளையும் $30,000 விலைக்கு விற்று விடுவார். Put ஒப்பந்தங்கள் அவரை பாதுகாத்து விடும். Stop loss எதுவும் போடாமல் இருந்திருந்தால் விவேக்கிற்கு நஷ்டம். $10,000 மதிப்புள்ள பங்குகளை $30,000க்கு வாங்க வேண்டும். ஏற்கனவே Put ஒப்பந்தங்களை விற்றதிலிருந்து $3,000 கிடைத்திருப்பதால் நஷ்டம் கொஞ்சம் குறையும். ஆனாலும் $17,000 ($30,000-$10,000-$3,000) நஷ்டம்.

3. மைக்ரோசாப்ட் பங்குகள் இப்போதைய விலைக்கே ($28) விற்கலாம்.அப்படி நடந்தால் வாகினி தன்னிடம் உள்ள Put ஒப்பந்தங்களை பயன்படுத்தி 1000 பங்குகளை $30,000க்கு விற்று விடுவார். அவர் $15,000 முதலீடு செய்திருந்தார். கூடவே Put ஒப்பந்தங்களை வாங்க $3,000 செலவு செய்திருந்தார். மொத்தம் $18,000 செலவு. பங்குகளை $30,000க்கு விற்று விடுவதால் வாகினிக்கு $12,000 லாபம். இப்போது விவேக்கிற்கு எவ்வளவு நஷ்டமாகியிருக்கும்? ஒரு பைசா கூட அவருக்கு நஷ்டமாகியிருக்காது! அவர் விற்ற ஒப்பந்தங்களின் விலை $3000த்திலிருந்து $2000க்கு குறைந்திருக்கும். இது எப்படி சாத்தியம் என்பதை அடுத்த பாகத்தில் பார்க்கலாம். ஒப்பந்தங்களின் விலை குறைந்ததால் விவேக்கிற்கு $1,000 லாபம்.

பொதுவாக கீழ்க்கண்ட விதிகளை கடைபிடித்தால் Put ஒப்பந்தங்களை விற்பதிலிருந்து லாபம் பெறலாம்.

1. எந்த பங்குகளுக்காக Put ஒப்பந்தங்களை விற்கிறீர்களோ அந்த பங்குகளின் நிறுவனத்தின் மேல் உங்களுக்கு நிறைய நம்பிக்கை இருக்க வேண்டும். ஏதோ ஒரு பத்திரிகையில் வந்த Stock tips-ஐ பார்த்து விட்டு Put ஒப்பந்தங்களை விற்றால் பெரும்பாலும் நஷ்டம் தான் கிடைக்கும்.

2. ஸ்டாப் லாஸ் ரொம்ப அவசியம். பங்குகளுக்கு வாங்கிய விலையை விட 8%-10% குறைவாக ஸ்டாப் லாஸ் போடுவோம். ஆனால் ஆப்ஷனுக்கு 10% ஸ்டாப் லாஸ் போட்டால் பேஜாராகி விடும். அதிக சதவிகிதத்தில் ஸ்டாப்லாஸ் போட வேண்டும். இதை விளக்குவது கொஞ்சம் கடினம். அடுத்த பாகத்தில் முயற்சி செய்து பார்க்கிறேன். சுருக்கமாக சொல்ல போனால் உங்களால் எவ்வளவு நஷ்டத்தை தாங்க முடியுமோ அந்த விலைக்கு ஸ்டாப் லாஸ் போடுவது நல்லது.

3. 6 மாதத்துக்குள் உள்ள ஆப்ஷன் ஒப்பந்தங்களை விற்றால் நல்லது. உதாரணமாக இப்போது நீங்கள் ஆப்ஷன் ஒப்பந்தங்களை விற்க விரும்பினால் மே 2006க்குள் உள்ள ஒப்பந்தங்களை விற்பது நல்லது.

4. பங்குகள் விற்கும் விலைக்கு அருகாமையில் உள்ள Strike price-ல் ஒப்பந்தங்களை விற்க வேண்டும். உதாரணமாக மைக்ரோசாப்ட் இன்று $28க்கு விற்கிறது. மார்ச் 2006க்கான $30 ஒப்பந்தங்களை விற்கலாம் அல்லது $25க்கான ஒப்பந்தங்களை விற்கலாம்.

பில் கேட்ஸ், மைக்கேல் டெல் போன்றவர்கள் அடிக்கடி தங்கள் நிறுவனத்தின் Put ஒப்பந்தங்களை விற்கிறார்கள். இவர்களின் நோக்கமே தங்கள் நிறுவன பங்குகளை பொது மக்களிடமிருந்து சகாய விலைக்கு வாங்குவது தான். தங்கள் நிறுவனங்களின் தலைவிதியை பற்றி இவர்களை விட அதிகமாக யாருக்கு தெரிய போகிறது?! அதனால் தைரியமாக Put ஒப்பந்தங்களை விற்கிறார்கள்.

இன்னும் இரண்டு பாகங்கள் இருக்கிறது….

பாகம் 1 பாகம் 2 பாகம் 3 பாகம் 4 பாகம் 6 பாகம் 7

Wednesday, November 16, 2005

பங்கு தரகர்களின் வலைத்தளத்தில் கொள்ளை

நீங்கள் பங்கு தரகர்களின் வலைத்தளங்களை உபயோகிப்பவராக இருந்தால், இதை படிக்கவும்.

முன்பெல்லாம் வங்கிகளை கொள்ளையடிக்க ஆள் பலம் வேண்டும், குறி தவறாமல் துப்பாக்கி சுட தெரிந்திருக்க வேண்டும், நிறைய முகமூடிகள் வைத்திருக்க வேண்டும். இப்போது கத்தியின்றி ரத்தமின்றி கொள்ளையடிக்கின்றனர், இன்டர்நெட்டின் உதவியால். கடந்த சில மாதங்களில் மட்டும் 20 மில்லியன் டாலர்கள் கொள்ளையடிக்கப் பட்டுள்ளன -- கீழ்க்கண்ட முறையை உபயோகித்து.

அமெரிக்காவின் கிழக்கு கரையில் உள்ள ஒரு பல்கலை கழகத்தில் விரிவுரையாளராக உள்ளார் திரு. மூர்த்தி. E-trade தரகர் கணக்கில் $174,000 மதிப்புள்ள பங்குகளை வைத்துள்ளார். இரண்டு மாதம் விடுமுறைக்காக ஆந்திரா சென்று திரும்புகிறார். E-trade தரகரிடம் இருந்து நிறைய தபால்கள் அவருக்காக காத்திருக்கின்றன். அதன் சாராம்சம் -"தாங்கள் விரும்பிய படி அத்தனை பங்குகளையும் விற்று, நீங்கள் சொன்ன வங்கி கணக்குக்கு wire transfer செய்து விட்டோம்". அதிர்ச்சியடைந்த மூர்த்தி தரகருக்கு போன் செய்கிறார். அவர் கணக்கில் ஒரு பைசா கூட கிடையாது. அவ்வளவு பணமும் வெல்ஸ் பார்கோ வங்கியின் நியூயார்க் கிளையில் ஒரு போலி கணக்குக்கு அனுப்பப்பட்டு , அங்கிருந்து ரஷ்யாவுக்கு போய்விட்டது.

இது ஏதோ கதை கிடையாது. உண்மை.

இது எப்படி நடந்தது? மூர்த்தியின் கம்ப்யூட்டரில் Firewall, Anti-virus software போன்ற சமாசாரங்கள் இல்லை. அதனால் ஹேக்கிங்க் செய்யும் மக்கள் சில வார்ம் போன்ற வஸ்துக்களை அவர் கணிணியின் உள்ளே விட்டு அவர் டைப் செய்வதை பதிவு (keylogging) செய்கிறார்கள். தரகரின் பெயர், வலைத்தளத்தின் பதிவுபெயர், சங்கேத வார்த்தை எல்லாம் கிடைத்து விடுகிறது. தரகரின் வலைத்தளத்திலே logon செய்து முதல் வேலையாக தொடர்பு கொள்ள வேண்டிய மின்னஞ்சல் முகவரியை மாற்றி தங்களின் மின்னஞ்சல் முகவரியை போட்டு விடுகிறார்கள். அந்த கணக்கில் உள்ள அத்தனை பங்குகளையும் மார்க்கெட் விலைக்கே விற்று விடுகிறார்கள். (மின்னஞ்சல் முகவரி மாற்றப் பட்டதால், பங்குகளின் சொந்தக்காரர்களுக்கு உடனே விஷயம் தெரியாது. தபால்காரர் வெடிகுண்டை கொடுக்கும் போது தான் தெரியும்.)

இப்போது கணக்கில் உள்ளது பணம் மட்டும் தான். தாங்கள் ஏற்கனவே தயார் செய்து வைத்திருக்கும் போலி வங்கி கணக்குகளுக்கு அத்தனை பணத்தையும் wire transfer செய்து விடுகிறார்கள். வங்கிகளில் பணம் சேர்ந்தவுடன் அதை ரஷ்யாவுக்கோ அல்லது பிரேசிலுக்கோ கொண்டு செல்வது Organized Crime மக்களுக்கு ரொம்ப சாதாரணம்.

இது போன்ற கொடுமை மூர்த்திக்கு மட்டுமல்ல, யாருக்கு வேண்டுமானாலும் நடக்கலாம். எந்த நாட்டிலும் நடக்கலாம். உங்கள் கம்ப்யூட்டரில் Firewall இல்லையென்றால் Zonealarm நிறுவனத்தின் இலவச மென்பொருளை download செய்து வைத்துக் கொள்ளுங்கள். Anti-virus மென்பொருளை வாங்கி வைத்துக் கொள்வது நல்லது.

தரகர்களும் இந்த விஷயத்தில் ரொம்ப ஆடிப் போயிருக்கிறார்கள். "நாங்கள் நன்றாக பாதுகாப்புடன் தான் இருக்கிறோம். எங்கள் வாடிக்கையாளர்கள் தான் தங்கள் வீட்டு சாவியை திருடர்களிடம் கொடுத்து விட்டு எங்கள் மேல் பழியை போடுகிறார்கள்" என்று புலம்புகிறார்கள். இது போல நிறைய கொள்ளைகள் நடந்தால் தங்களின் வியாபாரம் போய் விடுமோ என்று பயப்படுகிறார்கள். நியாயமான பயம் தான்.

Saturday, November 12, 2005

ஆப்ஷன் - பாகம் 4

பாகம் 1 பாகம் 2 பாகம் 3 பாகம் 5 பாகம் 6 பாகம் 7

நீங்கள் வாங்கி வைத்துள்ள பங்குகளின் விலையை பாதுகாக்கவும் சில ஆப்ஷன் ஒப்பந்தங்கள் உதவும். அந்த மாதிரி ஆப்ஷன் ஒப்பந்தங்களுக்கு "Put" என்று பெயர்.

நீங்கள் கூகுல் (Google) நிறுவனத்தின் 100 பங்குகளை ஒரு பங்கு $390க்கு வாங்குகிறீர்கள் என்று வைத்துக் கொள்வோம். $39,000 முதலீடு செய்கிறீர்கள். இது ஒரு சாதாரண தொகை அல்ல. ஒரு வேளை இந்த பங்குகளின் விலை ரொம்ப சரிந்து விட்டால் என்ன செய்வது என்று கவலைப்படுகிறீர்கள். அப்போது உங்களிடம் ஒருவர் வந்து "கவலையே படாதீங்க சார்...ஜனவரி 2006க்குள் கூகுல் ஷேர் எந்த விலைக்கு விற்றாலும் சரி, உங்களிடம் உள்ள 100 பங்குகளையும் ஒரு பங்கு 390 டாலருக்கு நானே வாங்கிக்கிறேன்... ஆனால், எனக்கு நீங்கள் 2000 டாலர் கொடுத்து விட வேண்டும், சரியா?" என்று கேட்டால் உங்கள் பதில் என்னவாக இருக்கும்?

"இது என்ன பம்மாத்து வேலையா இருக்கு? நான் வாங்கின விலைக்கே உங்கிட்ட விக்கனும், கூடவே ரெண்டாயிரம் டாலர் வேற கொடுக்க வேண்டுமா? எத்தனை பேர் இது மாதிரி கிளம்பியிருக்கீங்க?" என்று கொதிப்பீர்களா...ஆமாம் என்றால், இதற்கு மேல் படிக்காதீர்கள்!

"நல்லதா போச்சு...39,000 டாலரை பாதுகாக்க 2000 டாலர் செலவு செய்யலாம். பெரும்பாலும் உங்களிடம் 390 டாலருக்கு இந்த பங்குகளை விற்கும் நிலைமை வராது. ஜனவரியில் கூகுல் லாபத்தை அறிவிக்கும் போது, மார்க்கெட்டை கலக்க போகிறது. இந்த பங்குகள் 450 டாலருக்கு மேல் விற்கும் என்று எதிர்பார்க்கிறேன். அப்படியே தப்பி தவறி 390 டாலருக்கு கீழே போய்விட்டால் உங்களிடம் 390க்கு விற்று விட வேண்டியது தான்..." என்று சொல்வீர்களா? உங்களுக்காக தான் இந்த வலைப்பதிவு.

ஒரு நிறுவனத்தின் மேல் நம்பிக்கை வைத்து தான் அதன் பங்குகளை வாங்குகிறோம். கூகுல் நல்ல நிறுவனம் தான். ஆனால் ஒரு பங்குக்கான விலை ரொம்ப அதிகம். வெறும் நூறு பங்குகளை வாங்குவதற்கே $39,000 கொடுக்க வேண்டியிருக்கிறது. $39,000 என்பது கிட்டத்தட்ட 19 மாதங்களின் சேமிப்பு. இவ்வளவு கஷ்டப்பட்டு சம்பாதித்த பணம் முழுவதையும் ஒரே நிறுவனத்தை நம்பி போடும்போது மனம் ஊசலாட தான் செய்யும். 39,000 டாலர் முதலீட்டை 2000 டாலரால் பாதுகாக்க முடிந்தால் அது நல்ல விஷயம் தான். இப்படி பாதுகாப்பதற்கு Put ஆப்ஷன் ஒப்பந்தங்கள் உதவும்.

Call ஒப்பந்தங்களும் Put ஒப்பந்தங்களும் ஒரே அடிப்படையில் தான் செயல்படுகின்றன. இன்னும் சில மாதங்களில் குறிப்பிட்ட விலைக்கு பங்குகளை வாங்குவதற்கு Call ஒப்பந்தங்கள் உதவுகின்றது. அதே போல இன்னும் சில மாதங்களில் குறிப்பிட்ட விலைக்கு பங்குகளை விற்க Put ஒப்பந்தங்கள் உதவுகிறது. இந்த இரண்டிலும் ரிஸ்க் அதிகமாக எடுப்பவர் பிரீயம் வாங்கி கொள்கிறார்.

Put ஒப்பந்தங்களை வாங்குவதிலும் விற்பதிலும் உள்ள லாப நஷ்டங்களை கொஞ்சம் விரிவாக பார்ப்போம்.

கூகுல் பங்குகள் நவம்பர் 11ம் தேதி $390க்கு விற்கிறது. அதே விலைக்கு 100 பங்குகள் நீங்கள் வாங்குகிறீர்கள். $39,000 முதலீடு. பங்குகளை வாங்கிய கையோடு ஜனவரி 2006, $390க்கான ஒரு Put ஒப்பந்தத்தையும் வாங்குகிறீர்கள். அதற்கு $2000 பிரீமியம் கொடுக்கிறீர்கள். இந்த பிரீமியத்தையும் சேர்த்து மொத்தம் 41,000 டாலர்களை கூகுல் நிறுவனத்தை நம்பி முதலீடு செய்கிறீர்கள்.

ஜனவரி மாதம் 20ம் தேதி அன்று நீங்கள் வாங்கிய Put ஒப்பந்தம் காலாவதியாகி விடும். நவம்பர் 11ம் தேதியிலிருந்து ஜனவரி 20ம் தேதிக்குள் எப்போது வேண்டுமானாலும் 390 டாலர் விலைக்கு கூகுல் பங்குகள் நூறை விற்று விட உங்களுக்கு உரிமை உள்ளது. ஜனவரி மாதம் 20ம் தேதி அன்று இந்த பங்குகள் $460க்கு விற்பதாக வைத்து கொள்வோம். அப்போது நீங்கள் இந்த பங்குகளை $390க்கு விற்க வேண்டிய அவசியமில்லை. அப்போது உள்ள நிலைமையை பொறுத்து நீங்கள் முடிவெடுக்கலாம். $440க்கு ஸ்டாப் லாஸ் போட்டு வைத்து கொள்ளலாம் அல்லது $460க்கு அத்தனை பங்குகளையும் விற்று விடலாம் அல்லது உங்களிடம் உள்ள பங்குகளுக்கு Covered Call விற்று விடலாம். எல்லாமே உங்கள் இஷ்டம் தான். Put ஒப்பந்தத்தை உங்களிடம் விற்றவர் உங்கள் பங்குகளுக்கு உரிமை கொண்டாட முடியாது.

ஜனவரி 20, 2006 அன்று $460க்கு நீங்கள் 100 பங்குகளையும் விற்பதாக வைத்து கொள்வோம். நீங்கள் $41,000 முதலீடு செய்திருக்கிறீர்கள் ($2000 பிரீமியத்தையும் சேர்த்து). ஒரு பங்கு $460 வீதம் விற்பதால் உங்களுக்கு கிடைக்கும் வருமானம் $46,000. உங்களின் மொத்த லாபம் $5,000.

ஒரு வேளை ஜனவரி 20ம் தேதி அன்று கூகுல் பங்குகள் $200க்கு போய் விட்டால் என்ன செய்வது? $390க்கு இந்த பங்குகளை விற்பதற்கு உங்களுக்கு உரிமை உள்ளது. உங்கள் தரகரின் மூலம் ஒரு பங்கு $390 வீதம் 100 பங்குகளையும் $39,000க்கு நீங்கள் விற்று விடலாம். இப்படி உங்கள் உரிமையை நிலை நாட்டுவதற்கு "Exercising your options" என்று பெயர். சில தரகர்கள் வலைத்தளம் மூலம் ஆப்ஷன் Exercise செய்ய அனுமதிப்பார்கள். சில தரகர்களிடம் தொலைபேசி மூலம் பேசி தான் இதை செய்ய முடியும். எப்படி செய்தாலும் கடைசி நிமிடம் வரை காத்திருக்காமல், பங்கு சந்தை திறந்தவுடன் செய்வது நல்லது.

இப்படி $390க்கு நீங்கள் பங்குகளை விற்று விட்டால், உங்களுக்கு $2000 நஷ்டம். இந்த 2000 டாலரும் Put ஒப்பந்தத்திற்காக செலவு செய்தது. ஒரு வேளை Put ஒப்பந்தம் வாங்காமல் இருந்திருந்தால்...? $19,000 நஷ்டம்.

நிம்மதியை விலைக்கு வாங்க முடியாது என்று நம் கவிஞர்கள் நிறைய கவிதை பாடியிருக்கிறார்கள். ஆனாலும், பங்குகள் விஷயத்தில் நிம்மதியை விலைக்கு வாங்கலாம். உங்களுக்கு $2000 பிரீமியம் கொடுக்க மனசில்லையன்றால் ஜனவரி 2006, $340 Strike priceக்கு Put ஒப்பந்தம் வாங்கலாம். அதன் பிரீமியம் $500 தான். ஆனால் வாங்கிய விலையை விட ($390) குறைந்த விலைக்கு தான் ($340) விற்க முடியும். Call ஒப்பந்தத்தில் Strike price உயர உயர ஆப்ஷன் பிரீமியம் குறையும். Put ஒப்பந்தத்தில் அப்படியே அது உல்டா -- Strike price உயர உயர ஆப்ஷன் பிரீமியம் அதிகமாகும்.

கூகுல் நிறுவனத்தின் ஆப்ஷன் விலைகள் மிக அதிகம், அதற்கு காரணம் Volatility. அதைப்பற்றி விரிவாக பிறகு பார்ப்போம். நீங்கள் Yahoo, IBM போன்ற பங்குகளின் Put ஆப்ஷனை வாங்கினால் பிரீமியம் குறைவாக இருக்கும்.

Put ஒப்பந்தத்தை உங்களிடம் விற்றவரின் நோக்கம் என்ன, அவர் எப்படி லாபம் சம்பாதிப்பார் என்பதை அடுத்த பாகத்தில் பார்ப்போம்.

கொசுறு செய்தி: அமெரிக்காவின் ரியல் எஸ்டேட் மார்க்கெட்டுக்கும் Put ஆப்ஷன் கொண்டு வர ஒரு சில வங்கிகள் முயற்சி செய்து வருகின்றன. ஒரு மாநிலத்தில் சோதனை முயற்சி நடந்து வருகிறது. அது வெற்றி பெற்றால், எல்லா மாநிலத்திலும் கொண்டு வருவார்கள். அப்படி நடந்தால் வீடு விலை சரிவதை பற்றி அதிகமாக கவலைப்படாமல் வீடு வாங்கலாம்.

பாகம் 1 பாகம் 2 பாகம் 3 பாகம் 5 பாகம் 6 பாகம் 7

Monday, November 07, 2005

நஷ்டத்தை நிறுத்து!

"Stop Loss" என்றால் என்ன? "Stop the Loss!" பங்கு சந்தையில் லாபமும் நஷ்டமும் மாறி மாறி வரும். நஷ்டமே வரக்கூடாது என்று ஒருவர் நினைத்தால் அவர் பங்கு சந்தையில் பணத்தை போடவே கூடாது. நஷ்டத்தை குறைத்து லாபத்தை அதிகப் படுத்துவது தான் ஸ்டாப் லாஸின் வேலை.

எல்லா தரகர்களுமே பங்குகளுக்கு ஸ்டாப் லாஸ் முறையை உபயோகப் படுத்த அனுமதிக்கிறார்கள். வெகு சில தரகர்களிடம் மட்டும் ஆப்ஷனுக்கு ஸ்டாப் லாஸ் அனுமதிக்க கூடிய தொழில் நுட்பம் உள்ளது. பங்குகளை மையமாக வைத்து ஸ்டாப் லாஸ் பற்றி பேசுவோம், எல்லோருக்கும் புரிந்து கொள்ள சுலபமாக இருக்கும்.

* * *

நவம்பர் 4, 2005:

Sandisk நிறுவனத்தின் 100 பங்குகளை ஒரு பங்கு $64க்கு வாங்குகிறேன். $6400 முதலீடு. இந்த நிறுவனம் செல் போன், டிஜிடல் கேமராக்களில் இருக்கும் Memory chips போன்ற சமாச்சாரங்களை தயாரிக்கிறது. கிறிஸ்துமஸ், புது வருட கொண்டாட்ட காலங்களில் இந்த நிறுவனத்தின் லாபம் அதிகரிக்கும். டிசம்பர் கடைசியில் இந்த பங்கு $75க்கு போகும் என்று எதிர்பார்க்கிறேன். அப்படி நடந்தால் என்க்கு $1100 லாபம். ஓரு வேளை அது நடக்காமல் போய்விட்டால்? ஏதாவதொரு பிரச்னையில் இந்த பங்குகளின் விலை சரிந்து விட்டால்? எதற்கும் இருக்கட்டுமென்று 100 பங்குகளுக்கும் $59 விலைக்கு ஸ்டாப் லாஸ் ஆர்டரை கொடுத்து விடுகிறேன். இன்று பங்கு சந்தை முடியும் போது இந்த பங்குகளின் விலை $66. மனசில் சந்தோஷம்.

நவம்பர் 7, 2005:

Goldman Sachs நிறுவனத்தில் பங்குகளை பற்றி ஆராய்ச்சி செய்யும் ஓரு புண்ணியவானுக்கு திடீரென்று ஞானோதயம் வருகிறது. Sandisk விற்பனை செய்யும் Memory Chips விலை குறைய வாய்ப்பிருக்கிறது, அதனால் இந்த பங்குகளின் எதிர்காலம் அவ்வளவு ஒன்றும் பிரகாசமாக இல்லை என்று அறிக்கை விடுகிறார்.

பங்கு சந்தை திறந்தவுடன் Sandisk பங்குகளின் விலை $64க்கு விற்க ஆரம்பிக்கிறது. மூன்று மணி நேரத்திற்குள் $60க்கு விழுந்து விட்டது. Goldman ஆள் மேல் எரிச்சலாக வருகிறது. இவ்வளவு பெரிய கண்டுபிடிப்பை மூன்று நாட்களுக்கு முன்பே சொல்லியிருக்க கூடாதா?

நவம்பர் 8, 2005:

பங்கு சந்தை திறப்பதற்கு முன்பே மேலும் மூன்று வங்கிகளின் ஆராய்ச்சிக் குழுவினர் "Goldman Sachs ஆள் சொன்னது சரி தான், இந்த நிறுவனத்துக்கு இன்னும் 4 மாதம் ஏழரை நாட்டு சனி” என்று சொல்லி வைக்கிறார்கள்.

பங்கு சந்தை திறக்கும் போது Sandisk பங்கு $59க்கு விற்க ஆரம்பிக்கிறது. உடனே எனது ஸ்டாப் லாஸ் ஆர்டர் வேலை செய்ய ஆரம்பிக்கிறது. என்னுடைய 100 பங்குகளையும் $59 விலைக்கு தரகர் விற்று விட்டார்.

பங்கு சந்தை மூடும் போது இந்த பங்குகள் $45க்கு விற்கிறது. இனி மேல் எந்த வருடத்திலும் நவம்பர் நாலாம் தேதியன்று பங்குகளை வாங்க கூடாது என்று முடிவு செய்கிறேன். நஷ்டமடைந்த $500க்கு ஒரு நல்ல டிஜிடல் கேமரா வாங்கியிருக்கலாமே என்று தொன்றுகிறது.

நவம்பர் 11, 2005:

Sandisk பங்குகளின் விலை $30. ஸ்டாப் லாஸ் என்ற உத்தியை கண்டு பிடித்தவர்களுக்கு நன்றி. அது மட்டும் போடாமல் இருந்திருந்தால் இன்று $3400 நஷ்டமாக இருந்திருக்கும்.


* * *

இது தான் ஸ்டாப் லாஸ். உங்களால் எவ்வளவு நஷ்டத்தை தாங்க முடியுமோ, அந்த நஷ்ட எல்லைக்கு பங்குகள் விழும் போது அதை விற்று விட வேண்டும். Sandisk போன்ற வேகமாக மேலே ஏறிய பங்குகள் அதே வேகத்தில் கீழே விழும். எவ்வளவு தூரம் விழும் என்று யாருக்கும் தெரியாது. அது கூடவே நாமும் விழுவதை விட நம்முடைய "Comfort Zone"-ஐ அந்த பங்கு தாண்டும் போது அந்த விளையாட்டிலிருந்து விலகிக் கொள்வது நல்லது.

ஓரு முக்கியமான விஷயம். மேலே சொன்ன உதாரணத்தில் நவம்பர் 8ம் தேதியன்று பங்கு சந்தை திறக்கும் போது Sandisk பங்குகள் $55க்கு விற்க ஆரம்பித்தால் ஸ்டாப் லாஸ் ஆர்டர் என் பங்குகளை $55க்கு விற்று விடும். $59க்கு ஸ்டாப் லாஸ் என்பதன் அர்த்தம் என்னவென்றால் “இந்த பங்குகள் $59 அல்லது அதற்கும் கீழே போகும் போது விற்று விடு”. ஸ்டாப் லாஸ் விலையை பங்குகள் அடைந்தவுடன் இந்த ஆர்டர் மார்க்கெட் ஆர்டராக மாறிவிடும். ஸ்டாப் லாஸ் விலையை விட குறைவான விலைக்கு பங்குகள் விற்கப்படுவது அபூர்வம். குறிப்பிட்ட நிறுவனத்தைப்பற்றி ரொம்ப கெட்ட செய்தி வந்தால் மட்டுமே அது நடக்கும்.

இப்பொது என் முகத்திலுள்ள பெசிமிஸ்ட் முகமூடியை தூக்கியெறிந்து விட்டு, ஆப்டிமிஸ்ட் முகமூடியை போட்டுக் கொள்கிறேன். ஓரு வேளை இந்த பங்குகளின் விலை $59க்கும் கீழே போகாமல் இருந்தால்? (Sliding Doors படம் பார்த்திருக்கிறீர்களா? தமிழில் 12B.)

நவம்பர் 8, 2005:

Sandisk நிறுவனத்தை சோனி நிறுவனம் விலைக்கு வாங்க யோசிக்கிறது என்று ஒரு தகவல். பங்கு சந்தை திறக்கும் போது இந்த பங்குகளின் விலை $74. பங்கு சந்தை முடியும் போது விலை $78. என்னுடைய ஸ்டாப் லாஸ் ஆர்டரை $59-லிருந்து $69க்கு மாற்றி விட்டேன்.


நவம்பர் 11, 2005:

ஆப்பிள் நிறுவனம் ஸான்டிஸ்க் நிறுவன அதிகாரிகளுடன் பேச்சு வார்த்தை நடத்துகிறது. பங்கு சந்தை திறப்பதற்கு முன்பே ஸான்டிஸ்க் நிறுவனத்தை ஒரு பங்கு $100 விலைக்கு வாங்க ஆப்பிள் ஒத்துக்கொள்கிறது. பங்கு சந்தை திறக்கும் போது ஸான்டிஸ்க் பங்குகளின் விலை $107. என்னுடைய ஸ்டாப் லாஸ் விலையை $69லிருந்து $100க்கு மாற்றி விடுகிறேன்.


ஏன் இப்படி ஸ்டாப் லாஸ் விலையை மாற்றிக்கொண்டே போக வேண்டும்? இந்த மாதிரி Bidding war நடக்கும் போது பங்குகளின் விலை ஊசலாடும். முடிந்த வரை லாபத்தை பாதுகாத்துக் கொள்வதற்காக செய்யும் உத்தி இது. ஓரு வேளை ஆப்பிள் பங்கு தாரர்கள் ஆப்பிள் நிறுவனத்தின் முடிவை ஏற்றுக்கொள்ளாவிட்டால் இந்த பங்குகளின் விலை திரும்பவும் $78 ரேஞ்சுக்கு போய் விடும்.

முடிப்பதற்கு முன் சில வார்த்தைகள்: $64க்கு வாங்கிய பங்குகளுக்கு $59 விலைக்கு தான் ஸ்டாப் லாஸ் போட வேண்டும் என்று எந்த விதியும் இல்லை. 8% - 10%க்கு மேல் நஷ்டம் அடைந்தால் விற்று விடுவது நல்லது. 8 சதவிகிதம் கணக்கு போட்டால் பங்கு விலை $64க்கு $59 ஸ்டாப் லாஸ் சரியாக இருக்கும். எல்லா ஸ்டாப் லாஸ் ஆர்டருகளும் GTC (Good till cancelled) ஆர்டர்களாக இருக்க வேண்டும்.

Saturday, November 05, 2005

Google மேனியா

Google பங்குகள் பறப்பதை பார்த்தால், 1998-2000ல் நடந்த நிகழ்ச்சிகள் கண்முண் தோன்றுகிறது. JDSU, Amazon, CMGI, Ciena போன்ற பல பங்குகள் ஒரே நாளில் $10, $20 என்று எகிறும். அவசரப்பட்டு வாங்க வேண்டாம், சில நாள் பொறுத்திருக்கலாம் என்று பொறுத்திருப்பேன். பங்குகள் விலை கீழே வரும் என்று காத்திருப்பேன். கடைசியில் வெறுத்துப் போய் வந்த விலைக்கே பங்குகளை வாங்கி அதிலும் நிறைய லாபம் பார்த்தேன்.

CMGI ஆப்ஷனில் ஒரே நாளில் $10,000 லாபம் பார்த்த காலம் உண்டு. அது நிஜமாகவே ஒரு கனா காலம். அந்த கனவு முடிந்த போது எங்கு பார்த்தாலும் ரத்த ஆறு. JDS Uniphase (JDSU) பங்கு $240லிருந்து சரிந்து $2க்கு விற்கிறது. CMGI $1 சொச்சம். இதே கதி Googleக்கு வர வாய்ப்பில்லை. ஆனால், எதிர்பார்ப்புகள் பொய்யாகும் போது பணம் போட்டவர்கள் துண்டை காணோம் துணியை காணோம் என்று ஓடப் போகிறார்கள், விலை சரிய போகிறது. அப்படியே சரிந்தாலும் $400லிருந்து $300க்கு போகுமே தவிர $100க்கு கீழே போக வாய்ப்பில்லை.

Google-ன் P/E விகிதம் 86, Yahoo-ன் P/E விகிதம் 35. ஆனால் Google-ன் EPS(ஒரு பங்குக்கான லாபம்) அதிகம். Google பங்கு மார்க்கெட்டில் வெளியிட்ட பங்குகளின் எண்ணிக்கை குறைவு, அதிக EPS-க்கு அதுவும் ஒரு காரணம். இன்னும் பல காரணங்களை எழுதி கொண்டே போகலாம். எல்லாவற்றையும் விட மக்களின் எதிர்பார்ப்பு ஒரு முக்கிய காரணம். எரியும் நெருப்பில் எண்ணெய் ஊற்றுவது போல ஜிம் கிரேமர் (Thestreet.com, Madmoney show) போன்ற ஆட்கள் 2006-ல் Google பங்கு $450க்கு விற்கும் என்று ஆருடம் சொல்கிறார்கள்.

Google பங்குகள் அடுத்த வருடம் $450க்கு போகுமா $45க்கு போகுமா என்று எனக்கு தெரியாது. ஆனால் ஒன்று நிச்சயம். இன்னும் பல நாட்களுக்கு, குறைந்த பட்சம் Jan 2006-ல் Google லாப நஷ்ட கணக்கை வெளியிடும் வரை, Google மேனியா தொடரும். அது வரை கிடைத்த பணத்தை அள்ளப் போகிறேன். கடந்த மூன்று வாரங்களில் இரு தடவை Google put ஒப்பந்தத்தை விற்று கொஞ்சம் பணம் சம்பாத்தித்தேன். அதன் விபரங்கள் இங்கே இருக்கிறது. December 340 put ஒப்பந்தத்தை $930க்கு விற்றேன், இப்போது அது $300க்கு விற்கிறது. அது $200க்கு போகும் போது திரும்ப வாங்கலாம் என்று யோசனை.

Google-ல் பணம் செய்ய சில யோசனைகள்:

1. 100 பங்குகளை $390க்கு வாங்கலாம், வாங்கியவுடன் நவம்பர் 2005, $390க்கான Call ஒப்பந்தத்தை $990க்கு விற்று விடலாம். நவம்பர் 18 அன்று Google $390க்கும் மேலே விற்றால் உங்களுக்கு $990 லாபம். 100 பங்குகளை வாங்குவதற்கு $39,000 செலவு செய்ய வேண்டும். Margin-ல் வாங்க உங்கள் தரகர் அனுமதித்தால் 19,500 முதலீடு செய்தால் போதும். $19,500க்கு $990 லாபம் (தரகர் கமிஷனை இதில் சேர்க்க வில்லை). ஆப்ஷன் - பாகம் 1,2- ல் பார்த்த covered call முறை இது.

2. நீங்கள் இரும்பு நெஞ்சம் கொண்டவராய் இருந்தால் நவம்பர் 2005, $350 call ஒப்பந்தம் ஒன்று வாங்கலாம். $4170 செலவு. Google $400க்கு போனால் இந்த call ஒப்பந்தம் $5000க்கு போகும். என்னைப் போன்ற பயந்த ஆளாக இருந்தால் ஜனவரி 2006, $350 call ஒப்பந்தம் வாங்கலாம். எது வாங்கினாலும் stop loss போட்டு விட்டால் நிம்மதியாக தூங்கலாம். தப்பி தவறி நவம்பர் 2005, $400+ call ஒப்பந்தங்களை வாங்கி விட கூடாது.

3. Google பங்குகள் சிலவற்றை $390+க்கு வாங்கலாம். $450-ஐ எட்டும் போது பாதி பங்குகளை விற்று விட்டு மீதி பங்குகளை $400க்கு stop loss போட்டு வைத்து கொள்ளலாம். Google பங்கு $450க்கு மேலே போய் கீழே சரிய ஆரம்பித்தால் பங்குகளை $400க்கு stop loss order விற்று விடும். போன வருடம் $145க்கு Google பங்குகள் சிலவற்றை வாங்கினேன், Google-ன் மேல் எனக்கு நம்பிக்கை இருக்கும் வரை அதை விற்க போவதில்லை.

பங்கு சந்தை ஒரு வகை சூதாட்டம். Las vegas போவது போன்றோ, லாட்டரி வாங்குவது போலவோ அவ்வளவு மோசமான சூதாட்டமில்லையென்றாலும் பங்கு சந்தை மனிதர்களும் மிருகங்களும் சேர்ந்து உலாவும் ஒரு காடு. தினந் தோறும் இவர்களுடன் தான் வேலை செய்து கொண்டிருக்கிறேன். ஒரே நாளில் ஒரு பங்கின் தலைவிதி எப்படி வேண்டுமானாலும் மாறலாம். மேலே சொன்னதில் இரண்டாவது யோசனை அதிக ரிஸ்க்கானது. கவனம் தேவை.


Disclaimer: நான் பங்குகளை வாங்க, விற்க அறிவுரை கொடுக்க வில்லை. என்னுடைய எண்ணங்களை இங்கு பகிர்ந்து கொள்கிறேன். உங்கள் ஆராய்ச்சிக்கு அதை பயன் படுத்தி கொள்ளுங்கள்.

Wednesday, November 02, 2005

அமெரிக்க ரியல் எஸ்டேட் - Update

பங்குகளுக்கு நாஸ்டாக் குறியீடு போல, வீடு விற்பனைக்கு PMI இன்சூரன்ஸ் கம்பெனி "ரிஸ்க் குறியீடு" என்று வைத்துள்ளது. ஒரு ஏரியாவில் ரிஸ்க் குறியீடு அதிகமாக இருந்தால், அந்த இடத்தில் உள்ள வீடு விலை சரிய "அதிக வாய்ப்புள்ளது" என்று அர்த்தம்.

சில ஊர்களின் ரிஸ்க் குறீயீடு:

ஊர்/ஏரியா பெயர் & ரிஸ்க் குறீயீடு
---------------------- --------------------

Sacramento-Arden, CA 456
Los Angeles, CA 460
Riverside, CA 466
Oakland-Fremont, CA 502
San jose, CA 472
Santa Ana, Anaheim, CA 522
Las Vegas, NV 197 (Surprise!)
Tampa, FL 201
San Diego, CA 536
Phoenix, AZ 93
Miami, FL 206
Nassau, NY 532
Fort Lauderdale, FL 288
San Francisco, CA 440
Washington D.C 236
Edison, NJ 362
Virgina Beach, Norfolk, VA 133
Newark-Union, NJ 232
Providence, R.I 464
Orlando, FL 111

ரிஸ்க் இல்லாமல் பணம் சம்பாதிக்க...

இது சாத்தியமா?!

முடியும், ஆனால் லாபம் கம்மியாகத்தான் கிடைக்கும். கீழ்க்கண்ட வங்கிகள் நல்ல வட்டி கொடுக்கின்றன.


வங்கியின் பெயர் வட்டி விகிதம் (வருடத்துக்கு)
________________ __________________________


சேமிப்பு கணக்குகளுக்கு:

Presidential Bank 4.12%
Emigrant Direct 4.00%
Capital One FSB 3.75%
HSBC bank USA 3.75%


Money market கணக்குகளுக்கு:

Keydirect 3.95%
Zions bank 3.87%
Umbrella bank 3.85%
GMAC bank 3.75%

ஒரு வருட CD-களுக்கு:

M&T Bank NA 4.60%
Virtual Bank 4.60%
GMAC Bank 4.60%
Netbank 4.45%
ING Direct 4.20% (30 மாதம்/60 மாதங்களுக்கு இன்னும் அதிகம் கிடைக்கும். இங்கு பார்க்கவும்)


குறிப்பு: வாசன் comment-ல் FDIC பற்றி எழுதியிருந்தார். மேலே குறிப்பிட்ட அத்தனை வங்கிகளும் FDIC மூலம் $100,000 வரை பாதுகாக்கப் பட்டவை. இருந்தாலும், நீங்கள் பணத்தை போடுவதற்கு முன்பே அந்த குறிப்பிட்ட கணக்கு FDIC-யால் பாதுகாக்கப் படுகின்றதா என்று double check செய்து கொள்ளவும்.

$100,000க்கு மேல் நீங்கள் முதலீடு செய்வதாக இருந்தால் பல வங்கிகளில் முதலீடு செய்யுங்கள். உதாரணமாக $170,000 முதலீடு செய்வதாக இருந்தால் $100,000-த்தை ஒரு வங்கியிலும்(FDIC insured) $70,000-த்தை இன்னொரு வங்கியிலும்(FDIC insured) முதலீடு செய்யலாம். இப்படி செய்வதன் மூலம் FDIC பாதுகாப்பு $170,000க்கும் கிடைக்கும். FDIC பற்றிய மேலும் பல விபரங்களுக்கு இங்கு செல்லவும். இந்த இணைப்பில் FDIC என்றால் என்ன, உங்கள் வங்கி FDIC-யால் பாதுகாக்கப் பட்டவையா என்ற விபரங்களை அறிந்து கொள்ளலாம்.

Related Posts Plugin for WordPress, Blogger...